யாழ் சினிமா விமர்சனம்

யாழ் சினிமா விமர்சனம்

மிஷ்டிக் பிலிம்ஸ் சார்பில் யாழ் படத்தை தயாரித்து, கதை, திரைக்கதை,வசனம் எழுதி எம்.எஸ் ஆனந்த் இயக்கியுள்ளார்.

வினோத் கிஷன்,டேனியல் பாலாஜி, சசிகுமார், சுப்பிரமணி, நீலிமாராணி, லீமா பாபு, மிஷா கோஷல், பேபி ரக்ஷனா ஆகியோர் நடிப்பில் உருவாகியுள்ள படம் ‘யாழ்”.
தொழில்நுட்ப கலைஞர்கள்:-ஒளிப்பதிவு-ஏ.கருப்பையா, எம்.நஷீர், இசை-எஸ்.என். அருணகிரி, பாடல்கள்-மணி அமுதன், யாழ் பாரதி, பாலகுமாரன், படத்தொகுப்பு-எல்விகே தாஸ், மக்கள் தொடர்பு-வெங்கட்.

இலங்கையில் போர் உச்சத்தில் இருக்கும் போது கன்னி வெடிகளுக்கிடையே இரண்டு மணி நேரத்தில் நடக்கும் சம்பவவங்களின் மூன்று கதைகளின் கோர்வை தான்; யாழ் படத்தின் கதை.

முதலில் அப்பாவி அபலைப்; பெண்ணான நீலிமா ராணி கைக்குழந்தையுடன் இருக்கையில் சிங்கள ராணுவ வீரர் டேனியல்பாலாஜியின் விசாரணைப் பார்வையில் சிக்குகிறார். விடுதலைப் புலி தமிழ்செல்வி என்று நினைத்து நீலிமாவை துரத்த கன்னி வெடியில் காலை வைத்து விடுகிறார் டேனியல் பாலாஜி. இடத்தை விட்ட நகர முடியாமல் தவிக்கும் டேனியல் பாலாஜி நீலிமா ராணியை குழந்தையை காரணம் காட்டி மிரட்டுகிறார். நீலிமா ராணிக்கு உதவ வரும் முதியவரும் கன்னி வெடியில் சிக்கி இறக்கிறார். டேனியல் பாலாஜிக்கு காப்பாற்ற வரும் இன்னொரு சிங்கள ராணுவ வீரரை சந்தர்ப்பம் பார்த்து சுட்டுக் கொல்கிறார் நீலிமா ராணி. இறுதியில் டேனியல் பாலாஜியிடமிருந்து நீலிமா தப்பித்து குழந்தையை காப்பாற்றினாரா? என்பது முதல் கதை.

இரண்டாவது வினோத் காதலிக்கும் லீமா பாபு ஊரை விட்டு போவதை பார்த்து தானும் உடன் செல்ல உடைமைகளை எடுத்து வரும் வழியில் அனாதையாக இருக்கும் பேபி ரக்ஷனாவை பார்த்து விசாரிக்கிறார். பேபி ரக்ஷனா தன் தாயை காணவில்லை என்றும், அவரை தேடிக் கண்டு பிடித்து சேர்க்குமாறு கூற வேறு வழியின்றி குழந்தையை தன்னுடன் அழைத்துச் செல்கிறார் வினோத். வரும் வழியில் சிங்கள ராணுவத்தினரின் விசாரணை என்று நேரம் சென்று விட கடற்கரைக்கு வருவதற்குள் காதலி உட்பட அனைவரும் படகில் சென்று விடுகின்றனர். இறுதியில் வினோத் காதலியை தேடிச் சென்றாரா? பேபி ரக்ஷனாவை விட்டு விட்டுச் சென்றாரா? அல்லது பேபி ரக்ஷனாவை தாயுடன் சேர்த்து வைக்க முயன்றாரா? என்பதே மீதிக் கதை.

மூன்றாவதாக லண்டனிலிருந்து மிஷா கோஷல் தன் காதலன் சசிகுமாரை தேடி இலங்கைக்கு வருகிறார். நண்பர்கள் உதவியுடன் சசிகுமாரை சமாதனம் செய்து லண்டனுக்கு அழைத்துச் செல்ல நினைக்கும் மிஷாவின் பேச்சை கேட்காமல் சொந்த ஊரிலேயே இருக்கப் போவதாக சசிகுமார் கூறுகிறார். கன்னி வெடியில் இறந்த தாயின் ஆன்மா சாந்தியடைய வேண்டுமானால் நிலத்தில் இருக்கும் கன்னி வெடிகளை அகற்றிய பிறகே லண்டன் வருவதாக சசிகுமார் சொல்கிறார். இதனால் கோபமடையும் மிஷா கோஷல் என்ன செய்தார்? சசிகுமாரை சமாதனம் செய்து அழைத்துச் சென்றாரா? இல்லையா? என்பதே க்ளைமேக்ஸ்.

இந்த மூன்று கதைகளில் நடித்த வினோத் கிஷன், டேனியல் பாலாஜி, சசிகுமார், சுப்பிரமணி;, மிஷா கோஷல், நீலிமா ராணி, லீமா பாபு ஆகியோருடன் பேபி ரக்ஷனா சிறப்பாகவும், இயல்பாகவும் நடித்திருப்பது படத்தின் தத்ரூபமான காட்சிகளுக்கு மேலும் மெருகுட்டுகிறது.

ஏ.கருப்பையா, எம்.நஷீர் ஆகிய இருவரின் ஒளிப்பதிவு இலங்கையில் நடக்கும் போரினால் அப்பாவி மக்களின் வாழ்வாதாரங்கள் பாதிக்கப்பட்டு அனாதைகளாகவும், அகதிகளாகவும் நடைப்பயணம் செல்வதையும், சிங்கள ராணுவத்தின் கெடுபிடி களையும், வானத்திலிருந்து விழும் குண்டு மழையிலிருந்து தப்பிக்க நினைக்கும் ஈழத் தமிழ் மக்கள் பதுங்கு குழிகளை தேடி ஒடுவதும், மூன்று வித பரிணாமங்களில் கதையை நகர்த்தி அச்சு அசலாக காட்சிக் கோணங்களில் தந்து அசத்தியிருக்கின்றனர்.
எஸ்.என் அருணகிரியின் இசையில் பாடல்கள் அனைத்தும் அற்புதமாக இருப்பதோடு அழகான வரிகள் கேட்க கேட்க தமிழின் இனிமை காதில் ஒலித்து மீண்டும் மீண்டும் கேட்கத் தூண்டுகிறது.

கதை, திரைக்கதை, வசனம், இயக்கம்- எம்.எஸ்.ஆனந்த். யாழ் என்ற இசைக்கருவியை உருவாக்கிய ஈழத் தமிழர்கள் தமிழர்களின் கலை, கலாச்சாரம்,பண்பாடு, சித்தாந்த கருத்துக்களை யாழ் மூலம் இசைத்து பல ஊர்களில் பரப்பி வந்ததால் அவர்களை பாணர்கள் என்று அழைக்கப்பட நாளடைவில் அந்த ஊருக்கு யாழ்ப்பாணம் என்ற பெயரும் வந்தது என்பதை முதல் பாட்டிலேயே வரைபடத்தின் மூலம் எடுத்துரைத்த விதமே கேட்கவும் பார்க்கவும் சிறப்பாக இருந்தது. அதன் பின் இலங்கையில் ஆரம்பம் முதல் இறுதி வரை இரண்டு மணி நேரத்தில் நடக்கும் கதையில் மூன்று வித கதைகள் தனித்தனியாக பயணித்து யாழ் இசைக்கருவியோடு நட்பு, காதல், வன்மம், செண்டி;மென்ட் கலந்து இன்னிசை விருந்து படைத்திருக்கிறார் இயக்குனர் எம்.எஸ்.ஆனந்த். வித்தியாசமான முயற்சியில் ஈழத் தமிழர்களின் பேச்சு, போராட்டங்கள், அவலங்கள், வாழ்வியலை யதார்த்தமாக மனதை தொடும்படி படம் பிடித்து தனித்தன்மையோடு இயக்கியிருக்கிறார் எம்.எஸ்.ஆனந்த். இதில் ஈழத் தமிழர்களை மையப்படுத்தி ஈழத்தமிழ் பாடலாசிரியர்கள் இயற்றிய பாடல்கள் இலங்கைத்தமிழில், இசையிலும், வசனத்திலும் கலந்திருப்பது செவிக்கு இனிமையாகவும், கண்களுக்கு இதமாகவும் இருக்கிறது.

மொத்தத்தில் யாழின் இனிமை திக்கெட்டும் பரவும்.

Please follow and like us:

Leave a Reply

Your email address will not be published. Required fields are marked *